Story: NILILALA NA MWANAMKE JUU YA KABURI - 15

ILIPOISHIA
Nililala usingizi wa matumaini. Niliamini ni lazima ningempata Samike. Nikiwa usingizini, niliota mseto wa ndoto za zamani na mpya. Katika ndoto mpya iliongezeka sura ya askari. Nilikiota kichwa chake. Nikawa kama naogelea katika ndoto za masufuria. Nilipoota kuhusu kufukuzwa, nilipiga makelele. Kama kawaida yao, wazinzi wakashtuka wakidhani ni fumanizi. Walipogundua ni mimi, kama ilivyo siku zote wakanipuuza. Mchezo wa nyama ukaendelea.

Endelea nayo...
Niliamka nisiye na matumaini. Nikawaza namna ya kumpata Mzee. sikupata jibu! Lilinijia wazo la... kuanza upya msako. Nikalikubali wazo hilo. Baada ya kujiandaa, nikaingia barabarani kumsaka mzee.


Kila mtu niliyekutana naye nilimuuliza, “Umemuona Mzee katoka jela leo?” majibu yalikatisha tamaa na kuvunja moyo. Hakuna aliyemwona Samike.

Nilirejea saa nne usiku nikiwa nimechoka. Mbwa mchafu akabweka aliponiona. Hapo nikapata sehemu ya kupoza hasira, nilimporomoshea matusi mazito yaliyomkata mdomo, akabaki kimya!

Chumbani nililala bila kusafisha kitanda. Nikiwa nusu kusinzia nusu kuamka, niliamua kusitisha msako wa Samike. Nikaamua kurejea nyumbani ifikapo asubuhi. Mtu yule wa ajabu aliyenikimbiza nikaapa kutokumkimbia tena. “Nitasimama anichinje na upanga wake wenye makali kuwili,” niliwaza kishujaa.

Nilichoka kulala, kuamka na kumtafuta mtu asiyepatikana. Zaidi, nilichoka kufukuzwa na yule Ndondocha asiye na haya. Safari ya kurejea nyumbani Chisanza haikuzuilika kwa gharama yoyote ile.

Nilikuwa miongoni mwa abiria 75 waliopanda basi la Mwendakwao. Safari kurejea nilikotoka iliwadia. Masaa yalikatika kama tulivyoukata mwendo. Kupunguza mawazo, nikauchapa usingizi.

Nilishtuka basi likiwa singida. Lilikuwa limesimama na watu wengi walishuka kuchukua chakula. Kwa kuwa yalipita masaa mengi bila kula, nilishuka kuchukua chochote.

‘Bobooooooh!’ honi ilisikika. Watu wote tukaanza kukimbia kuingia ndani ya basi. Yalisimama mabasi matatu, letu liliegesha katikati. Kila abiria alikuwa makini katika kuchagua gari alilopanda vinginevyo angechanganya.

Niliingia ndani ya basi langu nikakaa. Nilichukua siti ya mbele hivyo niliweza kuiona safari kama alivyoiona dereva. Mbele yetu lilitangulia basi lililoitwa ‘Kinyonga.’ Nalo lilijaa abiria kama lilivyojaa letu.

Wakati gari la mbele lilipoanza kuukata mwendo, mzee mmoja alichungulia dirishani. Nilishtuka. Alikuwa na nywele nyeupe, sharubu nyeupe, na ndevu nyeupe. Nikajikuta nikitamka kwa nguvu, “Samike!” hata hivyo nilichelewa. Gari lilikwisha chochewa likaseleleka kwa kasi.

Nilipata matumaini. Na niliwaza bila shaka basi lile lilikwenda Chisanza, hivyo ningempata Mzee huyu niliyemtafuta kwa udi, manemane na uvumba.

Nilifarijika nilipoliona basi alilopanda likiwa mbele na langu likiwa nyuma. Nilifurahi jinsi nilivyokuwa na uhakika wa kusafiri njia moja na mtu niliyemtafuta.

Hatimaye Popo kafanikiwa kumuona mzee! Atampata? Tukutane kesho…