NO BEEF: UONGOZI WA JAY DEE WARUHUSU CLOUDS FM KUPIGA NA KUTAJA JINA LA JAY DEE KADRI WAWEZAVYO

Baada ya takriban miaka minne ya uadui mkubwa, Lady Jaydee ametangaza kuwa hana tatizo tena na Clouds Media Group. Uamuzi huo umekuja baada ya Mkurugenzi wa Vipindi wa Clouds Media Group, Ruge Mutahaba kudai kuwa wapo tayari kuanza kucheza nyimbo za muimbaji huyo mkongwe iwapo atawapa ruhusa.

Jaydee alisema uongozi wake ndio utakaokuja na maamuzi kufuatia ofa ya Ruge. “Kama kuna kauli yoyote ambayo itatakiwa kutoka, management itatoa kauli hiyo ya nini kitafuata.” Na Jumatano hii kupitia kipindi cha Amplifaya cha Clouds FM, uongozi wa Lady Jaydee ulitoa...
taarifa yake rasmi kuhusiana na kuwa tayari kufanya kazi tena na kituo hicho.

“Hatuna tatizo na Clouds Media Group kuanza kupiga nyimbo za Lady Jaydee. Wanaweza kuanza kupiga wakati wowote watakapokuwa tayari kwakuwa chochote kilichotokea hapo nyuma kimefikia tamati, la msingi sasa ni amani na upendo vitawale,” yalisema maelezo yake.
“Kuanzia leo wana uhuru wa kupiga na kutaja jina la Lady Jaydee kadri wawezavyo.”